Allianza dal Center Engiadina Bassa / Val Müstair

Ün cordial bainvgnü sülla homepage da l’Allianza dal Center Engiadina Bassa / Val Müstair  

L’Allianza dal Center Engiadina Bassa / Val Müstair sta aint per ün spazi da viver autentic e persistent chi spordscha perspectivas per l’avegnir ed üna ota qualità da vita tant a famiglias, sco eir a persunas giuvnas e seniors. Per ragiundscher quai in tuot las regiuns da nos chantun faja dabsögn da mantegner üna buna sporta dal service public, ma eir sportas decentralas süls chomps da la sandà e da la scolaziun. Implü douvraina access a tuot l’infrastructura digitala ed actuala ed üna promoziun da gestiuns innovativas sün tuot ils chomps e surtuot pro la mansteranza ed il turissem, sco eir la promoziun d’üna agricultura efficazia e na l’ultim eir da promouver l’adöver da nossa resursa indigena – la forza idraulica. Per tuot ils chomps serva da promouver eir la transfuormaziun digitala.

Per cumüns ferms ed independents

L’Allianza dal Center Engiadina Bassa /Val Müstair s’ingascha per cumüns ferms ed autonoms chi pon mantegner e survgnir lur cumpetenza dapertuot là inua chi’d es pussibel e fa sen. Be cun pudair decider directamaing al lö as po chattar soluziuns simplas, sveltas ed adequatas per nossa populaziun. Nos parti s’ingascha per cha la depopulaziun da nos cumüns giaja inavo e pretenda perquai cleramaing eir dal chantun e da la confederaziun üna strategia d’üna populaziun decentrala in nos pajais. Per accumpagnar quella strategia dovra natüralmaing las masüras da rom chi tuornan per cha umans possan viver e lavurar gugent eir in regiuns da muntogna e regiuns periferas.

Üna società chi s’orientescha a las valurs cumprovadas

Nus stain aint per üna politica, illa quala la società chi s’orientescha eir inavant a valurs cumprovadas tenor nossas ragischs cristianas da l’Europa d’immez. Per nus sta l’uman aint il center e nus ans ingaschain per üna economia sociala da marchà liber chi garantischa a tuot ils umans da nos pajais per entradas adequatas. Uschè ans ingaschain adüna eir per la classa mezdana e per las famiglias. Tant pro persunas chi mainan affars sco talas chi sun impiegadas, la classa mezdana vain adüna plü ferm suot squitsch economic. Perquai pretendain da dis-chargiar eir a quellas persunas surtuot süls chomps da sandà ed impostas. Nus sustgnain eir masüras e structuras per promouver la cumpatibiltà da manster e famiglia sco eir per promouver soulas adequatas ed insomma üna buna scolaziun.

Politica d’economia liberala

L’allianza dal Center Engiadina Bassa / Val Müstair sta aint per üna politica d’economia liberala. Obstaculs bürocratics han da svanir dapertuot, ma nus ans ingaschain pustüt per impraisas pitschnas e mezdanas chi fuorman pro nus ed in tuot il pajais la pozza principala da l’economia. Las impraisas in nossas regiuns dessan avair bunas premissas per as sviluppar ed impraisas nouvas chi dessan gnir fundadas o as chasar aint in nossas regiuns dessan chattar qua premissas attractivas. Il turissem es in Grischun üna da las pozzas economicas principalas e dess adüna avair bunas premissas per lavurar. Ma eir l’agricultura chi fuorma eir üna pozza economica in nos chantun, ma mantegna eir las ragischs da nossa società ed il purtret da nossa cuntrada, es indispensabla per nos chantun. Il Grischun nu po exister sainza agricultura da muntogna e l’alpagiar. Perquai s’ingascha nos parti per üna politica agrara chi promouva tuot l’agricultura tant giò la val sco in muntogna. I vala lapro eir da far adöver da prodots agriculs indigens d’ota qualità in gestiuns turisticas da la regiun.